ក្រុម​មន្ត្រី​ព្រៃ​ឈើ និង​អភិរក្ស​សត្វ​ព្រៃ​ បាន​សិក្សា​​​​​​ស្រាវជ្រាវ​អំពី​​សត្វព្រៃ និង​ព្រៃ​ឈើ​នៅ​ក្នុង​តំបន់​សហគមន៍​មួយចំនួន​ក្នុង​ខេត្ត​ឧត្តរមានជ័យ បាន​រក​ឃើញ​ថា ពូជ​សត្វ​​​​ដ៏​កម្រ​នៅ​លើ​ពិភពលោក​មួយ​ចំនួន​ដែល​ជិត​ផុត​ពូជ​ទៅ​ហើយ​នោះ នៅ​មាន​វត្តមាន​ក្នុង​ព្រៃ​សហគមន៍​នេះ​នៅ​ឡើយ។

ការ​កាប់​បំផ្លាញ​ព្រៃ​ឈើ និង​បរបាញ់​សត្វ​ព្រៃ​ក្នុង​ប្រទេស​កម្ពុជា កន្លង​មក​បាន​ធ្វើ​ឲ្យ​ព្រៃ​ឈើ​ហិនហោច និង​បាត់​ពូជ​សត្វ​ព្រៃ​ស្ទើរ​គ្មាន​សល់។ តែ​ទោះជា​យ៉ាង​ណា​ក្ដី កម្ពុជា​ក៏​នៅ​មាន​សេសសល់​សត្វ​ព្រៃ​ដ៏​កម្រ​ខ្លះៗ​ដែរ ដែល​ស្ថិត​នៅ​ក្រោម​ការ​គ្រប់គ្រង​របស់​សកម្មជន​បរិស្ថាន។ មន្ត្រី​អង្គការ ផេក ខេមបូឌា (Pact Cambodia) និង​អង្គការ​សត្វព្រៃ​អន្តរជាតិ (Wildlife International) សហការ​ជាមួយ​នាយកដ្ឋាន​រដ្ឋបាល​ព្រៃ​ឈើ​នៃ​ក្រសួង​កសិកម្ម​កម្ពុជា បាន​ឲ្យ​ដឹង​ថា ក្រោម​ការ​គាំទ្រ​ពី​ក្រសួង​ការបរទេស​​សហរដ្ឋ​អាមេរិក អង្គការ​ទាំង​ពីរ រួម​ទាំង​រដ្ឋបាល​ព្រៃឈើ​កម្ពុជា បាន​ធ្វើ​​ការ​សិក្សា​​​​​​មួយ​​​ឡើង​នៅ​ខែ​វិច្ឆិកា ឆ្នាំ​២០១០ ស្ដីពី​​ចំនួន​សត្វ​ព្រៃ និង​គុណភាព​ព្រៃឈើ​សហគមន៍​ដែល​គេ​កំពុង​អភិរក្ស​នៅ​ក្នុង​ខេត្ត​​ ឧត្តរមានជ័យ។ ការ​ស្រាវជ្រាវ​នេះ​ធ្វើ​ឡើង​​ក្នុង​សហគមន៍​ព្រៃ​ឈើ​ចំនួន​​៤​ គឺ​សហគមន៍​ព្រៃ​ឈើ​សង្ឃរុក្ខវ័ន សហគមន៍​សង្គ្រោះ​ព្រៃឈើ អណ្ដូងបរ និង​សហគមន៍​ព្រៃ​ស្រោង ដែល​មាន​ផ្ទៃ​ដី​ព្រៃ​សរុប​​ទំហំ ៣៤,៧៧៣​ហិកតារ។

សេចក្ដី​ប្រកាស​ព័ត៌មាន​រួម​នៃ​អង្គការ ផេក ខេមបូឌា និង​អង្គការ​សត្វ​ព្រៃ​អន្តរជាតិ ចុះ​ថ្ងៃ​ទី​២៥ មីនា បង្ហាញ​ថា ការ​ស្រាវជ្រាវ​នោះ​បាន​សិក្សា​ស្រាវជ្រាវ​លើ​ប្រភេទ​សត្វស្លាប​​សរុប​ចំនួន ​ ១៧៤​ប្រភេទ និង​សត្វ​ជើង​បួន ២៦​ប្រភេទ។ ជា​​លទ្ធផល​បាន​បង្ហាញ​ថា ក្នុង​ចំណោម​ចំនួន​សត្វ​ដែល​បាន​ស្រាវជ្រាវ​ទាំង​នោះ គេ​ឃើញ​មាន​ពូជ​សត្វស្លាប​​ដ៏​កម្រ​​ចំនួន ៧​ប្រភេទ ដូចជា​សត្វ​ក្ងោក​ពណ៌​បៃតង​ ​ត្រដក់​ធំ ននាល សត្វ​អង្កត់​ខ្មៅ និង​សត្វស្លាប​ដ៏​កម្រ​ផ្សេង​ទៀត​។ ​ចំណែក​​​សត្វ​ជើង​បួន​វិញ គេ​ឃើញ​នៅ​មាន​ចំនួន ៩​ប្រភេទ ដូចជា​សត្វ​ខ្លា​ធំ ខ្ទីង រមាំង ទន្សោង ឆ្កែព្រៃ សត្វ​ទោច​ជាដើម ដែល​ពពួក​ពូជ​សត្វ​ទាំង​នោះ​កំពុង​ជិត​ផុត​ពូជ​​ក្នុង​ពិភពលោក។