ចំពុះធំកន្ទុយវែង
សត្វចំពុះធំកន្ទុយវែង គឺជាឈ្មោះបក្សីមួយប្រភេទ មានដងខ្លួនពណ៌បៃតង បំពងកពណ៌លឿងភ្លឺ កន្ទុយវែងពណ៌ខៀវ បន្ទូលក្បាលពណ៌ខ្មៅ។ នៅពេលមិនទាន់ពេញវ័យ បក្សីនេះមានបន្ទូលក្បាលពណ៌បៃតងដែរ និងច្រើនរស់នៅតាមព្រៃស្រោង។ ជាទូទៅបើតាមការសិក្សាពីជីវសាស្ត្ររស់នៅ បក្សីនេះគឺជាប្រភេទសត្វស្លាបដែលចូលចិត្តលាក់ខ្លួនជាទីបំផុត ហើយភាគច្រើនគេអាចកត់ត្រាបានក្នុងបក្សីសត្វស្លាបនៅកម្ពុជានេះតាមរយៈសំឡេងរបស់វា។ នៅក្នុងកំណត់ត្រា គេបានឃើញវាតែម្ដងគត់នៅតំបន់ភ្នំបូកគោ ក្នុងឆ្នាំ១៩៩៩ ហើយវាត្រូវបានចាត់ចូលជាប្រភេទបក្សីកម្រ។ ចំពោះរដូវបន្តពូជវិញ គឺចាប់ពីខែកុម្ភៈ ដល់ខែកញ្ញា៕