ឈ្មុសប្រែង
ឈ្មុសប្រែង អាចមុជ និងហែលទឹកដើម្បីចាប់ត្រី (Arctictis binturong) ភិនភាគ៖ ឈ្មុសប្រែងជាប្រភេទសំពោចដែលមានមាឌធំជាងគេ មានសម្បុរក្រម៉ៅលាយជាមួយពណ៌ត្នោតនៅខាងចុងនៃរោម រូបរាងដូចសត្វខ្លាឃ្មុំធំ រោមវែងៗហើយក្រាស់ វាអាចឡើងដើមឈើបានដោយប្រើកន្ទុយសម្រាប់តោងពីមែកមួយទៅមែកមួយ។ រោមនៅខាងចុងត្រចៀកមានពណ៌ស ត្រចៀកមូលហើយនៅខាងចុងមានពណ៌ស។ សត្វញីមានដោះពីរគូ។
ជីវសាស្ត្រ៖ ឈ្មុសប្រែងនេះចូលចិត្តរស់នៅតំបន់ព្រៃដែលមានដើមឈើខ្ពស់ៗ ជាសត្វរកចំណីនៅពេលយប់ដោយបំលាស់ទីយឺត។ នៅពេលថ្ងៃ សត្វនេះដេកនៅតាមប្រហោងឈើដោយប្រើកន្ទុយរបស់វាហ៊ុំព័ទ្ធក្បាល។ ចំណីរបស់វាមានផ្លែឈើ និងសត្វរស់នៅតាមដើមឈើ ដូចជាបក្សី អំបូរកកេរ សត្វល្អិត បង្គួយ មិនតែប៉ុណ្ណោះ វាអាចមុជ និងហែលទឹកនៅតាមអូរ ក្នុងព្រៃដើម្បីចាប់ត្រីតាមមាត់ច្រាំងទៀតផង។ សត្វនេះបន្តពូជស្ទើរពេញមួយឆ្នាំ សត្វមេអាចមានកូនចន្លោះពី១-៣ក្បាល/១ឆ្នាំ ហើយអាយុកាលរបស់វាប្រហែល ១៨ឆ្នាំ។
រប៉ាយរស់នៅ៖ ប្រភេទនេះមានតិចតួចនៅព្រៃស្រោងក្នុងប្រទេសកម្ពុជា។ គេក៏បានរកឃើញផងដែរនៅប្រទេសឥណ្ឌូនេស៊ី (កោះស៊ូម៉ាត្រា) ម៉ាឡេស៊ី (កោះបរណេអូ) ថៃខាងជើងភូមា និងខាងកើតប្រទេសឥណ្ឌា។
ស្ថានភាពអភិរក្ស៖ ឈ្មុសប្រែងស្ថិនក្នុងក្រុមប្រភេទមានដោយបង្គួរ និងត្រូវបានចុះបញ្ជីនៃសៀវភៅក្រហម IUCN (LC) ថាជាប្រភេទរងគ្រោះថ្នាក់តិចតួច។ ប្រភេទនេះកំពុងរងគ្រោះពីការទាក់ចាប់ និងបរញ់ដើម្បីធ្វើពាណិជ្ជកម្ម។