(ពុទ្ធសាសនា) ពរដប់ប្រការ ដែលព្រះនាងសុបារសុប្បតីម្ដាយព្រះវេស្សន្តរសូមពរពីព្រះឥន្ទ្រ។ ពរទាំងនេះ ចែងក្នុងកណ្ឌទី១ ឈ្មោះកណ្ឌទសពរក្នុងរឿងមហាវេស្សន្តរជាតក គឺ ១-សូមឱ្យបានជាអគ្គមហេសី នៃព្រះបាទស្រីសញ្ជ័យសោយរាជ្យនៅនគរជេតុត្តរ។ ២-សូមឱ្យមាននេត្រាមូលខ្មៅយង់ មានភមោ (ចិញ្ចើម) កោងទ្រទេសទ្រទួយដូចចង្កួយកៅទណ្ឌ (ធ្នូ)។ ៣-សូមឱ្យមាននាមថា សុបារសុប្បតី (ផុស្សតី) ដដែល។ ៤-សូមឱ្យមានបុត្រាដ៏ប្រសើរមួយអង្គ មានកិត្តិនាមល្បីល្បាញ ចូលចិត្តឱ្យទាន។ ៥-ពេលទ្រង់គភ៌សូមឱ្យមានឧទររាបស្មើល្អដូចប្រក្រតី។ ៦-សូមកុំឱ្យមានដោះសណ្ដាយ។ ៧-សូមកុំឱ្យមានសក់ស្កូវ។ ៨-សូមឱ្យមានសាច់សម្បុរល្អិតល្អបីដូចពពិលមាស។ ៩-សូមឱ្យអាចដោះទុក្ខទោសរបស់មនុស្សសត្វទាំងឡាយ។ ១០-សូមឱ្យមានសព្វសត្វ គឺហង្ស ក្រៀល ក្ងាន សឹងហើយឆ្វាត់ឆ្វៀលបន្លឺនូវសព្ទនោះឮល្វេងល្វើយពីរោះឰដ៏ព្រះរាជមន្ទីរនិងសូមឱ្យមានអ្នកប្រាជ្ញរាជបណ្ឌិតចេះធម៌អាថ៌កុំបីឱ្យដាច់អំពីព្រះរាជមន្ទីរ។