បញ្ចុះ
( កិ. ) ធ្វើឲ្យចុះ ។ បញ្ចុះកំពង់ ដាក់ប្រដាប់បន្លុងប្រគេនភិក្ខុសង្ឃ ជាកិច្ចឧទ្ទិសផលបុណ្យបញ្ជូនទៅបុគ្គលដែលទើបធ្វើមរណកាលថ្មីៗ (ពាក្យសាមញ្ញ, ពាក្យរាបសាហៅថា ប្លុង; ធ្វើតាមប្រពៃណីរបស់ប្រទេស); បរិភោគច្រើនហើយថែមទាំងយឺតយូរក្រឈប់ក្រលែង មិនចេះអស់មិនចេះហើយ : ចុះវាបញ្ចុះកំពង់ដល់ណាទៀត ? (ព. ទ្រ. ម.) ។ បញ្ចុះជ្រំ ដាក់អ្វីៗច្រើនមុខលាយឡំគ្នា ។ បញ្ចុះដន្លាប់ សូត្រសែកមន្តអាគម ប្រសិទ្ធីក្រមួនមាត់ក្នុងដន្លាប់ (តាមទម្លាប់អ្នកដែលជឿ) ។ បញ្ចុះដំណាប់ ដាក់បន្លួញក្នុងដំណាប់ ។ បញ្ចុះធាតុ ដាក់អដ្ឋិធាតុក្នុងដីឬក្នុងផែនដី ។ បញ្ចុះតម្លៃ គិតឬដាក់តម្លៃឲ្យថយចុះតិចជាងមុន ។ បញ្ចុះបញ្ចូល និយាយណែនាំពន្យល់ឲ្យចុះចូល ។ បញ្ចុះសីមា ចងសីមាដោយមាននិមិត្តកំណត់ព្រំដែន សម្រាប់ភិក្ខុសង្ឃធ្វើសង្ឃកម្មផ្សេងៗ តាមវិន័យព្រះពុទ្ធសាសនា ។ល។
- (សិល្បៈ) ឈ្មោះក្បាច់បាត ឬក្បាច់មូលដ្ឋានសម្រាប់បំពត់រាងកាយ ដើម្បីបង្កើនសោភណភាព និង សុក្រឹតភាព តាមចលនាលឿនរហ័សហៅថា <<ឡក>> តាមចង្វាក់ភ្លេងពិណពាទ្យ ឬ តាមរនាតឯក និង សម្ភោរ ឬប្រសិនបើគ្មានឧបករណ៍ភ្លេង អ្នកហាត់ទាំងអស់ស្រែកជាចង្វាក់ព្រមៗគ្នាថា៖ <តាក់ ធីង ធីង ធីង តាក់ ធីង ធីង...>, <តាក់ តាក់ ធីង តាក់ ធីង...>, <ធីង ធីង ធីង...>។