ផ្សោតគ្មានព្រុយខ្នង
ភិនភាគ៖ ផ្សោតគ្មានព្រុយខ្នងជាថនិកសត្វមានទំហំតូចជាងក្នុងអំបូរផ្សោត និងមានប្រវែងដងខ្លួនទើបនឹងកើតពី ៦៨-៨០ស.ម ពេញវ័យ ១,៥៥-២ម និងកូនទើបកើតមានទម្ងន់ ៦គ.ក ពេញវ័យ ៧២គ.ក។ ផ្សោតប្រភេទនេះពុំមានព្រុយខ្នងទេ ប៉ុន្តែនៅពីលើខ្នងមានទ្រនុងអ័ក្សគ្រើមដូចធ្មេញរណាកាត់តាមចង្អូរបណ្តោយខ្នង។ ក្បាលមូលគ្មាចំពុះ។ ដងខ្លួនមានពណ៌ប្តូរពីប្រផេះទៅខ្មៅនៅលើខ្នង និងចំហៀងសង្ខាង ហើយមានពណ៌ប្រផេះស្រាលលាយពណ៌សនៅផ្នែកខាងក្រោម។ ជីវសាស្ត្រ៖ ជាទូទៅវារស់នៅតែឯកឯង និងជាក្រុមតូចៗនៅទីកន្លែងស្ងប់ស្ងាត់។ វាងើបឡើងមកលើផ្ទៃទឹក ដើម្បីដកដង្ហើមដោយមិនបង្ហាញឲ្យឃើញខ្លួនទាំងមូលឡើយ។ ចំណីអាហាររបស់វារួមមាន បង្គា មឹក ត្រីជាដើម។
រប៉ាយរស់នៅ៖ នៅប្រទេសកម្ពុជា វារស់នៅតាមទឹករាក់ៗនៃឆកកំពង់សោម លាតសន្ធឹងពីទិសនិរតីបន្តដល់ កោះរុង កោះរងសន្លឹម តាមឆ្នេរភាគខាងជើងខេត្តកោះកុង និងឆ្នេរកែប។ ប្រភេទនេះមានរស់នៅផងដែរនៅតាមឈូងសមុទ្រថៃ អាស៊ីភាគខាងកើត ភាគខាងត្បូងបង់ក្លាដេស ចិន ប៉ាគីស្ថាន អ៊ីរ៉ាក់ ជប៉ុន សឹង្ហបុរី និងវៀតណាម។
ស្ថានភាពអភិរក្ស៖ ផ្សោតគ្មានព្រុយខ្នងជាប្រភេទមានដោយកម្រ និងបានចុះបញ្ជីក្រហម IUCN (DD) ជាប្រភេទមិនទាន់មានទិន្នន័យគ្រប់គ្រាន់លើពិភពលោក និងត្រូវបានចាត់ថ្នាក់នៅក្នុងឧបសម្ព័ន្ធទី១ នៃអនុសញ្ញា CITES ។