ពង់ បា.; សំ. ( ន. ) (វំស; វំឝ) វង្ស, ត្រកូល, ពូជ, អម្បូរ ។ ពង្ស​ចរិត, ពង្ស​ប្រព្រឹត្ត, ពង្ស​ប្រវត្តិ (ពង់-សៈ--) ដំណើរ, លំអាន, នៃ​វង្ស​ត្រកូល ។ ពាក្យ​សម្រាប់​កំណត់​សន្មត​ហៅ​ឆ្នាំ​កំណើត​របស់​មនុស្ស តម្រូវ​នឹង​ពូជ​ពង្ស​របស់​ទេព្ដា, មនុស្ស​និង​យក្ស តាម​ហោរា​សាស្ត្រ គឺ​ឆ្នាំ​ជូត, រោង, មមី, មមែ, ជា ពង្ស​ទេព្ដា (ទាំង ៤ នេះ ចែក​ជា​គូ​ប្រុស​និង​ស្រី គឺ ជូត, រោង ពង្ស​ទេព្ដា​ប្រុស; មមី មមែ ពង្ស​ទេព្ដា​ស្រី); ឆ្លូវ, ថោះ, ម្សាញ់, កុរ ពង្ស​មនុស្ស (ទាំង ៤ នេះ​ចែក​ជា​គូ​ប្រុស​និង​ស្រី គឺ​ឆ្លូវ, ម្សាញ់ ពង្ស​មនុស្ស​ប្រុស; ថោះ, កុរ ពង្ស​មនុស្ស​ស្រី); ខាល, វក, រកា, ច, ពង្ស​យក្ស (ទាំង ៤ នេះ​ចែក​ជា​គូ​ប្រុស​និង​ស្រី គឺ វក, រកា, ពង្ស​យក្ស​ប្រុស; ខាល, ច ពង្ស​យក្ស​ស្រី) ។