សង្កេត
សំ. បា. ( ន. ) ការកំណត់, ការមត់គ្នា, ណាត់គ្នា, ប្តេជ្ញាគ្នា; ការយល់ព្រមជាមួយ; សញ្ញា; ការពិនិត្យឲ្យឃើញច្បាស់ : ធ្វើតាមសង្កេត ។ ខ្មែរច្រើនប្រើជា កិ. សំដៅសេចក្ដីថា “ពិនិត្យ, ចំណាំ, គ្នេរគ្នាន់, រំពឹងមើល ឲ្យឃើញជាក់” : ត្រូវសង្កេតមើលសិន; បានសង្កេតឃើញសព្វគ្រប់ហើយ ។ សូត្របាលីពិនិត្យតាមអក្ខរប្បភេទ : សូត្រធម៌សង្កេត (ម. ព. សង្កត់ ១ កិ. ផង) ។ បើរៀងភ្ជាប់ពីខាងដើមសព្ទដទៃ អ. ថ. សង់កេតៈ; ដូចជា : សង្កេតកម្ម ការឲ្យសញ្ញា ។ សង្កេតការណ៍ ហេតុដែលគួរសង្កេត, ហេតុនៃការពិនិត្យមើល។ សង្កេតភាព ដំណើរសង្កេត ។ សង្កេតលក្ខណៈ លក្ខណៈនៃការពិនិត្យមើល ។ សង្កេតវិធី បែបនៃការពិនិត្យមើល ។ល។