អ៊ុត
( កិ. ) សង្កត់ឲ្យរាបសាច់សំពត់ដោយឆ្នាំងក្ដៅ : អ៊ុតខោ, អ៊ុតអាវ ។ សង្កត់ដោយកញ្ចប់ដីខ្សាច់ក្ដៅជាដើមឲ្យរាបស្លាប់សាច់ : អ៊ុតស្លឹកសង្កែ ។ បើកបង្ហើបគម្របបានអាប៉ោងសន្សឹមៗ បន្តិចម្តងៗ ដោយឱនផ្តេកក្បាលពិនិត្យសង្កេតផ្ទៀងមើលភ្នែកអាប៉ោងនោះយ៉ាងហ្មត់ចត់ : អ៊ុតអាប៉ោង, អាល័យតែអ៊ុតអាប៉ោង គោស៊ីស្រូវអស់ ។ ពិនិត្យសង្កេតផ្ទៀងមើលយ៉ាងហ្មត់ចត់និងយ៉ាងសន្សឹមៗនូវអាការឬល្បិចជាដើមនៃល្បែងស៊ីសងឯទៀតៗ ក៏ហៅថា អ៊ុត ដែរ : អ៊ុតសន្លឹកបៀ ។ល។ អ៊ុតសក់ ធ្វើសក់ក្បាលឲ្យមានសណ្ឋានផ្សេងៗដោយប្រដាប់អ៊ុតតាមសម័យនិយម ។ ឆ្នាំងអ៊ុត ឆ្នាំងសម្រាប់អ៊ុត, ប្រដាប់សម្រាប់អ៊ុត ។ ព. ប្រ. ស្ដីបន្ទោសជ្រក់ជ្រេញកម្ដៅចិត្តរាល់វេលាងើបមុខពុំរួច ឬសង្កត់សង្កិនញាំញីជានិច្ច : បើព្រឹកអ៊ុតល្ងាចអ៊ុតយ៉ាងនេះ នឹងទ្រាំនៅតទៅទៀតមិនកើតទេ ! (ព. សា.) ។ល។