កាលានុវត្តភាព

ខ្មែរ

/កាឡានុវាត់តៈភាប/ /kaalaa-nuvoat-ta-phiap/ មកពីពាក្យ​បាលី កាល + អនុវត្ត + ភាវ >កាលានុវត្តភាព ។ ឱកាស​ដ៏​ល្អ​សម្រាប់​ធ្វើ​អ្វី​មួយ​ប្រកប​ដោយ​ជោគជ័យ​ ។ Opportunity. See SWOT analysis or analysis of Strength, Weakness, Opportunity, and Threat of someone or something.

1. opportunity, opprotunité កាលៈទេសៈដ៏សមគួរឬដំណើរវិវឌ្ឍត្រូវពេលវេលា ឱកាសដែលអនុគ្រោះសម្រាប់ចាប់យកប្រយោជន៍អំពីកិច្ចការអ្វីមួយ ឬ គុណសម្បត្តិអ្វីមួយដែលកំពុងលេចឡើង ក៏ប៉ុន្តែការទាញយកប្រយោជន៍នោះ គឺអាចប្រឈមនឹងហានិភ័យ ហើយចាំបាច់ត្រូវប្ដេជ្ញាចិត្តយ៉ាងមុតមាំ និង មានធនធានគ្រប់គ្រាន់ ទើបគេអាចទាញយកប្រយោជន៍នោះបាន។ ឧ.: វិបត្តិសេដ្ឋកិច្ចពិភពលោកឆ្នាំ២០០៨-២០០៩ ផ្ដល់កាលានុវត្តភាពដល់កម្ពុជាសម្រាប់អភិវឌ្ឍវិស័យកសិកម្មដ៏មានសក្ដានុពលរបស់ខ្លួន។ ដើម្បីសម្រេចកិច្ចការនេះ កម្ពុជាត្រូវការទាំងធនធានមនុស្ស ទាំងធនធានហិរញ្ញវត្ថុយ៉ាងច្រើនសន្ធឹកសន្ធាប់ សម្រាប់វិនិយោគលើហេដ្ឋារចនាសម្ព័ន្ធរូបវន្តចាំបាច់របស់ខ្លួន។
2. ក្នុងន័យសេដ្ឋកិច្ច ប្រើផ្សំនឹងថ្លៃដើម (opportunity cost) ពាក្យនេះមានន័យថាជាថ្លៃដើម កាលានុវត្តភាព ដែលសំដៅដល់ថ្លៃដើមនៃជម្រើសល្អផ្សេងទៀត ដែលត្រូវបានបោះបង់ចោល។ ពាក្យនេះប្រើក្នុងគោលដៅធានាឱ្យបាននូវប្រសិទ្ធភាពនៃការប្រើប្រាស់ធនធានដែលមាន។
3. កាលានុវត្តភាព ក្នុងកាលៈទេសៈខ្លះអាចត្រូវបានគេប្រើជាវេវចនសព្ទជាមួយនឹងពាក្យ <<ឱកាស>> ប៉ុន្តែជាទូទៅគេប្រើពាក្យ <<ឱកាស>> សម្រាប់បញ្ជាក់ពីពេលវេលា ឬ កាលៈទេសៈ ធម្មតាប៉ុណ្ណោះ។ ឧ.: ថ្ងៃនេះ មេឃស្រឡះល្អ។ ដូច្នេះ វាជាឱកាសល្អសម្រាប់កសិករហាលស្រូវអង្កររបស់ខ្លួន។